Erstes Spiel der B-Juniorinnen!

fcarleshAllgemein, Juniorinnen B0 Comments

soccergirl

Am Mäntig 21. November 2016 het unseri neu gründeti Juniorinne B Mannschaft ihres erschte Fründschaftsspiel dörfe bestritte. Gegner sin d’B-Juniorinne vom FFC Therwil gsi. Viele Dank nomol an Therwil, dass ihr zu uns cho sind und zu eme tolle Erlebnis für die Mädels bidreiht hän. Mer freue uns jetzt scho uf s’Rückspiel im Friehlig bi euch in Therwil. Do beidi Mannschafte gnueg Spielerinne drbi kha händ, händ mer spontan entschiede 11er Fuessball z’spiele anstatt em 9er Fuessball wo denn i dr Meisterschaft gspielt wird.

Für die meiste Spielerinne vo uns isch es ihres erschte offizielle Spiel gsi, so dass Kickschueh und zum Teil au Schienbeischoner vo de Frauemannschaft usglehnt worde sin, so dass alli e kompletti Usrüstig kha hän. Viele Dank an Alli vo de Fraue, wo mitgholfe hän & au an die wo sin cho zueluege. Das doch no sehr junge und unerfahrene Team isch vo 5 Juniorinne wo in dr Frauemannschaft spiele unterstützt worde, au do Merci viilmol, dass ihr drbi gsi sind und s’Team unterstützt hän.

Uf em Feld het me sehr schnell gmerkt, dass dr Gegner über doch eingies mehr an Erfahrig verfüegt und au scho länger zämmespielt. So dass sie vo Afang a Spiel dominiert hän und au gli scho in Füehrig gange sin. Aber au mer hän mit es paar doch schöne Kombinatione uns es paar Chance chönne erarbeite, leider hets nid glängt für dr erschti Goalerfolg. Therwil het mit zum Teil sehr schöne Süpielzüg ihri Füehrig bis zur Pause witr usbaut. Nach em Pausetee sin denn au mer zu unserem erschte und denn au scho gli zweite Torerfolg cho. Therwil het aber noch wie vor Spiel bestimmt und witeri Goals folge loh, was zu eme Endstand vo 2:8 gführt het.

Es isch e tolle erschte Match gsi vo allne Beteiligte, vor allem wenn me bedenkt, dass mer erscht sit guet 5 Wuche zämme trainiere und doch einigi Spielerinne drbi kha hän, wo no chli chliner gsi sind wie dr Reschte. Alli sind aber mit viel Liedeschaft, Freud und Isatz drbi gsi und hän ihri Sach sehr guet gmacht.. Es het wahnsinnig Spass gmacht mit euch de Match z’spiele, mer werde uf dem ufbaue und freue uns uf d’Spiel mit euch im kommende Friehlig. Dankschön au an d’Zsophia wo das Spiel gleitet het und an die zahlriche Zueschauer, wo dr Match verfolgt hän.

Für Arlesheim drbi gsi sind:

Besijana, Carla, Dunja, Mariyam, Giuliana, Fiona, Lea Mina, Elena, Emma, Severine, Flurina, Lilly, Mirjam, Sara, Anna & Geni

 

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind markiert *